Policia e Bulqizës jep informacion lidhur me helmimin e 11 nxënësve në një shkollë 9-vjeçare të Bulqizës.
Nxënësit shfaqën probleme shëndetësore pasi në orën e vizatimit kanë përdorur sapun për të bërë disa forma. Era e rëndë e detergjentit i shkaktoi nxënësve dhimbje barku dhe të vjella.
Policia thotë se të gjithë nxënësit janë jashtë rrezikut për jetën dhe se për zbardhjen e ngjarjes tashmë kanë nisur hetimet.
“Bulqizë, informacion paraprak
Me datë 20.03.2019, nxënësit e klasës së gjashtë, të një shkolle 9-vjeçare, në qytetin e Bulqizës, kanë qenë duke zhvilluar orën mësimore të vizatimit (ku dyshohet se kanë përdorur detergjent që shërben për larje), dhe gjatë kësaj ore një pjesë e nxënësve janë ndjerë keq nga ana shëndetësore, të cilët pasi kanë marrë ndihmë mjekësore në spitalin e Bulqizës, janë larguar nga spitali dhe ndodhen jashtë rrezikut për jetën.
Grupi hetimor vijon hetimet për zbardhjen e shkaqeve të ngjarjes”, njofton policia.