Kryetari i PD, Lulzim Basha, priti sot në një takim Krye Zv. Ndihmës Sekretaren e Shtetit, Elisabeth Millard.
Gjatë takimit me zyrtaren e lartë amerikane Basha foli për “përkeqësimin e të gjitha standarteve të demokracisë dhe kapjen e shtetit nga krimi i organizuar në Shqipëri”.
Kryedemokrati tha se “lidhjet e politikës me krimin janë kthyer në shqetesimin kryesor në vend sepse sot kriminelë dhe banda të rrezikshme kontrollojnë qeverisjen dhe përfitojnë shumicën e parave dhe aseteve publike”.
Kreu i opozitës e njohu Krye Zv. Ndihmës Sekretaren e Shtetit, Elisabeth Millard, me nismën e opozitës për vettingun e politikës, për pastrimin e Parlamentit, Qeverisë dhe institucioneve të tjera shtetërore nga politikanë, sipas Bashës, të korruptuar dhe të lidhur me krimin.
“Në një vend ku krimi dikton vendimarrjen - theksoi zoti Basha - nuk mund të flitet për institucione të pavarura dhe standarde demokratike”.