Në studion e “Open” ka agravuar debati mes numrit dy të PS, Taulant Balla dhe analistit Andi Bushati, lidhur me figurat që kanë marrë pjesë në spotin elektoral të PS, konkretisht Robert Ndrenika dhe Tinka Kurti.
Bushati ka thënë se ata janë shitur, ndërsa Balla i është përgjigjur i revoltuar, duke i thënë se çdokush ka të drejtë të ketë bindjet e tij politike.
Ai e cilësoi këtë akuzë të Bushatit një turp të madh për figurën që përfaqësojnë Ndrenika dhe Kurti.
Bushati: Një njeri që ka pranuar zgjedhjet e 1996, ka qenë deputet i 1996 dhe ka votuar Berishën në 1997, shitet dhe blihet kur të dojë.
Balla: Ç’i do lekët ai mo?
Bushati: Të gjithë i duan lekët mo pse vetëm ju i doni lekët?
Balla: Ore ç’i do Robert Ndrenika lekët. Artist populli burri botës, ka të drejtë të jetë më këdo parti, të ketë bindjen e vetë. Ai edhe na kritikon ne, por thotë që kjo është qeveria e duhur për Shqipërinë. Të thuash që një familje e djathtë si Tinka Kurti, shitet dhe blihet për një spot...
Bushati: Ata që ka hedhur Berisha në kosh në 1997 kanë dalë të mbrojnë sot Edi Ramën, ju ka ngelur t’ju mbrojnë fosilet e Berishës.
Balla: Më vjen neveri të akuzosh njerëz në punë të vetë 80 vjeç që kanë të drejtë të marrin pjesë në tubim politik, mund të më akuzojë mua që më ka këtu, por jo një gjyshe 80-vjeçare që ka marë lekët për spotin e PS.
Bushati: Janë fosilet e Berishës në 1997.
Balla: E vetmja fosile është Berisha. Nuk kemi të drejtë t’i marrim nëpër gojë.
Bushati: Çdo njeri që del në fushatë është i komentueshëm, nuk mund t’i themi kriminelë, por mund ta komentojmë. Me Çiljetën jeni tallur gjithmonë dhe e morët prapë.