Hapësire reklamuese

Rajoni

Arrestimi i ish-luftëtarit të UÇK në Serbi, Gërvalla: Lajmëruam ndërkombëtarët

Shkruar nga Newsbomb
Arrestimi i ish-luftëtarit të UÇK në Serbi, Gërvalla:

Ditën e djeshme avokati i ish-luftëtarit të UÇK përmes një postimi në profilin e tij në Facebook, tha se Hasan Dakaj është arrestuar nga policia serbe në Merdarë rreth orës 09:00 të mëngjesit teksa po udhëtonte më vëllain e tij drejt Italisë.

Ai i bëri thirrje Ministrisë së Jashtme të Kosovës, me në krye Gërvallën si dhe Kryeministrit Albin Kurti që përmes metodave diplomatike të kërkojë lirimin e Dakajt.

Ministria e Punëve të jashtme dhe Diasporës të Kosovës, sot ka reaguar në lidhje me arrestimin e ish-ushtarit të UÇK-së, Hasan Dakajt dhe Xhavit Dakajt, nga autoritetet serbe, ditën e djeshme në Merdare, kur po kalonte kufirin për të shkuar më pas drejt Italisë.

MPDJ njofton se Xhavit Daka është liruar, ndërsa shton se se për këtë çështje kanë njoftuar zyrën e BE-së në Serbi, Ambasadën e SHBA-së dhe atë të Britanisë së Madhe.

“Pas njoftimit mbi arrestimin e dy qytetarëve të Republikës së Kosovës, Hasan dhe Xhavit Daka (ky i fundit tashmë i liruar), Ministria e Punëve të Jashtme dhe Diasporës ka aktivizuar të gjithë mekanizmat e saj institucional. Janë njoftuar edhe mekanizmat ndërkombëtarë për veprimet e Serbisë ndaj qytetarëve të Kosovës. Për këtë rast është njoftuar Zyra e BE-së në Serbi, Ambasada e SHBA-ve dhe ajo e Britanisё sё Madhe nё Serbi”,- thuhet në njoftim.

Po ashtu, ministria thekson se shteti i Kosovës dënon ndalimin, arrestimin dhe keqtrajtimin e qytetarëve të Kosovës në Serbi.

Ministria e Punëve të Jashtme dhe Diasporës dënon ashpër ndalimin, arrestimin dhe keqtrajtimin e qytetarëve të Republikës së Kosovës dhe njëkohësisht i bën thirrje Bashkësisë Ndërkombëtare që të ndermarrë hapa konkret për lirimin e menjëhershëm të qytetarit Hasan Daka dhe njëkohësisht të kërkojë përgjegjësi nga shteti serb për këto veprime arbitrare dhe destruktive dhe që bien ndesh me konventat ndërkombëtare për të drejtat e njeriut”,- thuhet më tej.

Lexo edhe: Arrestohet ish-luftëtari i UÇK-së në Serbi, po udhëtonte me të vëllanë drejt Italisë

Ndër të tjera, MPDJ ka njoftuar se do t’u drejtohet autoriteteve serbe me një kërkesë për të lejuar shefin e Zyrës Ndërlidhëse të Kosovës në Serbi, Jetish Jasharin, që të vizitojë të arrestuarin Hasani.

“Zyra Ndёrlidhёse e Republikёs sё Kosovёs nё Serbi, do tё paraqes kёrkesё zyrtare autoriteteve serbe pёr tё lejuar Ambasadorin Jashari ta vizitojё z. Hasan Daka, nё mёnyrё qё shteti dhe Qeveria e Republikёs sё Kosovёs tё njoftohet mё konkretisht pёr trajtimin qё po i bёhet z. Daka nga organet serbe.  MPJD do t’iu mbajë të informuar rreth këtij rasti dhe për çdo informatë të re do t’ju njoftojmë me kohë. Njëkohësisht ftojmë të gjithë qytetarët që mund të ballafaqohen me vështirësi të natyrave të ndryshme gjatë udhëtimit të tyre nëpër Serbi, që të na kontaktojnë në numrin e telefonit: +383 46 51 00 51”.

Sondazh

Poll

Lexo gjithashtu

Hapësire reklamuese