Pas apelit nga OSBE, ka reaguar dhe ambasada britanike lidhur me zgjedhjen e kryetarit të AMA-s ditën e sotme në Kuvend.
Me anë të një shënimi në rrjete sociale, Ambasada e Britanisë së Madhe thotë se e kandjekur me kujdes zgjedhjen e kryetarit dhe anëtarëve të bordit të AMA-s teksa apelon që zgjedhja e tyre të bëhet me profesionalizëm të plotë.
Theksohet se kreu i AMA-s duhet të jetë i pavarur pasi kjo ndikon në besimin e publikut te pavarësia e mediave.
Më herët dje PD ka denoncuar dhe ka akuzuar Ramën se do të vendosë në krye të AMA-s zëdhënësen e tij, Armela Krasniqi.
Shënimi i Ambasadës britanike
Ambasada Britanike ka ndjekur procesin e zgjedhjes së kryetarit dhe anëtarëve të bordit të Autoritetit të Mediave Audiovizive (AMA).
Autoritetet rregullatore të mediave kanë një rol kritik në përforcimin e standardeve, integritetit dhe pavarësisë së mediave.
Procedurat transparente janë thelbësore për të siguruar besimin e publikut dhe të të gjithë aktorëve të medias te rregullat, ligji dhe autoritetet publike.
Sot theksojmë thirrjen e partnerëve ndërkombëtarë për të garantuar profesionalizmin e AMA-s përmes zgjedhjes së kandidatëve të pavarur në strukturat drejtuese të institucionit.