Trupa mbrojtëse e Mario Përlleshaj, 14-vjeçari i cili qëlloi me thikë për vdekje bashkëmoshatarin e tij, Martin Cani, kanë apeluar vendimin e Gjykatës që dërgoi pas hekurave në burgun e Kavajës të miturin.
Avokatët e Përlleshaj kanë arguemtuar se duhet të merret parasysh mosha e të dënuarit ndërsa kanë thënë se ai veprim është kryer nga 14-vjeçari nën cilësinë e mbrojtjes vetjake. Këto argumente do të arsyetohen përpara trupës gjykuese të Gjykatës së Apelit e cila pritet të përcaktohet në ditët në vijim.
Kujtojmë që të shtunën, Mario Përlleshaj është marrë në pyetje nga hetuesit në praninë e avokatit, babait të tij dhe psikologut.
Kjo ngjarje ka ndodhur në datën 18 nëntor disa metra pranë shkollës 9-vjeçare “Fan Noli” në kryeqytet. Nxënësit e kësaj shkolle janë konfliktuar me njëri-tjetrin për motive të dobëta ndërsa debati ka degraduar në përdorimin e thikave.
Martin Cani është i mituri i cili humbi jetën pas goditjeve të marra në zemër nga Mario Përlleshaj, ndërsa miku i tij Luis Meçja përfundoi në spital në gjendje të rëndë nga goditjet e marra në bark dhe kraharor.
Vetë autori i kësaj ngjarje, u vetëplagos gjatë këtij sherri duke këputur tendinat e dorës. Ai u shtrua për disa ditë në një prej spitaleve private në Tiranë ku dhe iu komunikua masa e “arrest me burg”. Mario Përlleshaj momentalisht ndodhet në ambientet e burgut për të mitur në Kavajë.
Sondazh
Lexo gjithashtu
