Hapësire reklamuese

Aktualitet

Sinodi i Shenjtë i Kishës mblidhet pas ndarjes nga jeta të Janullatos, vendoset drejtuesi i përkohshëm i Kishës

Shkruar nga Newsbomb
Sinodi i Shenjtë i Kishës mblidhet pas ndarjes nga jeta të
Anastas Janullatos

Pas ndarjes nga jeta të Kryepiskopit të Kishës Ortodokse Autoqefale të Shqipërisë, Imzot Anastasit, Sinodi i Shenjtë u mblodh në një seancë të jashtëzakonshme për të përcaktuar hapat që do të ndiqen në këtë periudhë zie dhe për të vendosur mbi drejtimin e përkohshëm të Kishës.

Në këtë takim solemn, klerikët më të lartë të Kishës Ortodokse Shqiptare shprehën dhimbjen për humbjen e figurës së shquar fetare dhe vendosën disa masa, përfshirë shpalljen e ditëve të zisë dhe organizimin e ceremonive mortore.

Ndër vendimet kryesore ishte emërimi i një mbikëqyrësi të përkohshëm të Fronit Kryepiskopal, ndërsa besimtarët u ftuan të bashkohen në lutje për shpirtin e Kryepiskopit të ndjerë. Nga datat 25 - 29 janar 2025  u shpall zi kishtare, ndërsa të martën do bëhet pritja e trupit të Kryepiskopit të ndjerë para Katedrales "Ngjallja e Krishtit" Tiranë.

NJOFTIMI I PLOTË

KISHA ORTHODHOKSE AUTOQEFALE E SHQIPËRISË

SINODI I SHENJTË

Sinodi i Shenjtë i Kishës Orthodhokse Autoqefale të Shqipërisë u mblodh në një seancë të jashtëzakonshme sot, më datë 25 janar 2025, në orën 11:30.

Në këtë seancë, Sinodi shprehu dhimbjen e thellë për fjetjen në Zotin të Atit dhe Kryebariut tonë, Kryepiskopit të ndjerë të Tiranës, Durrësit dhe të gjithë Shqipërisë, Imzot Anastasit.

Gjithashtu, Sinodi i Shenjtë mori këto vendime:

1. Zgjedhjen e Mitropolitit të Korçës, Imzot Joanit, si Mbikqyrës (Locum Tenens) të Fronit Kryepiskopal.

2. Shpalljen e zisë kishtare për pesë ditë, nga datat 25 - 29 janar 2025.

3. Pritja e trupit të Kryepiskopit të ndjerë do të bëhet para Katedrales "Ngjallja e Krishtit" Tiranë, të martën, datë 28 janar, ora 16:00. Pas pritjes, homazhet do të mbahen brenda Katedrales gjatë kësaj pasditeje dhe gjatë gjithë ditës së nesërme, të mërkurën, datë 29 janar 2025.

4. Shërbesa e varrimit do të kryhet ditën e enjte, datë 30 janar, ora 11:00, pas Liturgjisë Hyjnore.

Në përfundim të seancës, Sinodi i Shenjtë kreu një shërbesë përshpirtjeje dhe, njëkohësisht, fton të gjithë besimtarët të bashkohen në lutje për prehjen e shpirtit të Atit dhe Kyebariut tonë, Kryepiskopit të ndjerë Imzot Anastasit.

Sekretariati

Mitropoliti i Amandias

† Nathanail

Tiranë, më 25 janar 2025

Sondazh

Poll

Lexo gjithashtu

Hapësire reklamuese