Kryetari i Partisë së Pensionistëve, Selami Jenisheri është larguar zyrtarisht nga koalicioni i ish-kryeministrit Sali Berisha.
Jenisheri ka depozituar në Komisioni Qendror të Zgjedhjeve më datë 25 mars ku dhe ka kërkuar që partia e tij të heqë dorë nga pjesëmarrja në zgjedhjet e 11 Majit 2025, për Kuvendin e Shqipërisë, si subjekt zgjedhor dhe si pjese e koalicionit "Aleanca për Shqipërinë Madhështore"
“Ju lajmërojmë dhe kërkojmë që subjekti zgjedhor Partia Bashkimi Popullor i Pensionisteve Shqiptar heq dore nga pjesëmarrja në zgjedhjet e 11 Majit 2025, për Kuvendin e Shqipërisë, si subjekt zgjedhor dhe si pjese e koalicionit "Aleanca për Shqipërinë Madhështore" e regjistruar për zgjedhjet e 11 Majit 2025, ndërkohë që zgjedhjet e 11 Majit 2025 janë të paligjshme, të pavlefshme dhe madje antikushtetuese dhe nuk mund të mbahen, kur akoma nuk ka mbaruar shqyrtimi i gjithë ankimimit për zgjedhjet e 25 Prillit 2021 dhe kështu sipas Kodit Zgjedhor për zgjedhjet e 25 Prillit 2021, nuk mund të ndahen mandatet, pasi janë të paligjshme dhe në kundërshtim me Kodin Zgjedhor me të cilën mbajtën zgjedhjet e 25 Prillit 2021.
Për sa me sipër zgjedhjet e 11 Majit 2025 bëhen te pakuptueshme (nul) të paligjshme dhe antikushtetuese dhe gjithsesi deri me 25 Prill 2025 nuk mund te kryhet asnjë veprim për zgjedhjet e 11 Majit 2025”, thuhet në kërkesë.
Kujtojmë se më 18 mars, i ftuar në emisionin “Të Paekspozuarit”, deklaroi se ai së bashku me partinë e tij “Bashkimi Popullor i Pensionistëve” kanë hequr dorën nga bashkëpunimi me ish-kryeministrin Sali Berisha për zgjedhjet e 11 Majit.
Jenisheri hodhi akuza kundrejt Flamur Nokës për të cilin tha se e ka mashtruar duke i kërkuar që të “firmoste” për t’u bërë pjesë e koalicionin “madhështor”, e për kushtet do ta thërriste në ditët në vijim.
“Asnjë mbledhje e 26 partive nuk është bërë. Asnjëherë nuk është mbledhur ai koalicion. Kur vjen puna, më kanë lënë deri në orën 20:00, kur janë dorëzuar listat nuk më kanë thirrur. Pastaj Noka më tha Selami firmos që je në koalicion, për të tjerat flasim nesër”, ka thënë Jenisheri, ndërkohë që një mesazh e ka pasur edhe për kreun e Partisë Demokratike.
Duke nxjerrë në shesh “pazaret” brenda demokratëve, kreu i partisë Bashkimi Popullor i Pensionistëve tha se ky koalicion është një “gënjeshtër”.
“I nderuar zoti Sali Berisha, qëndrimi juaj për partitë, 26 aleatë, që pretendon se ky është koalicion më i madh i mundshëm. Aleanca e Shqipërisë Madhështore është një gënjeshtër që i drejton popullit shqiptar. Unë dhe aleatët nuk na ka thirrur njeri dhe nuk ka marrë mendim për listat dhe asgjë”, tha ai ndër të tjera.
Sondazh
Lexo gjithashtu
