Hapësire reklamuese

Aktualitet

Operacioni ICARO, reagon SPAK: Nën hetim 40 persona, ja si u demaskuan "bosat" e drogës

Shkruar nga Newsbomb
Operacioni ICARO, reagon SPAK: Nën hetim 40 persona, ja si u demaskuan
SPAK

Një organizatë kriminale e specializuar në trafikun e kokainës është goditur në një operacion të përbashkët mes SPAK dhe Prokurorisë së Brescias. Operacioni, i koduar "ICARO", rezultoi me ekzekutimin e 12 urdhër-arresteve dhe marrjen në pyetje të 8 personave të tjerë. Hetimet nisën në vitin 2020, duke zbuluar një rrjet të mirëorganizuar që trafikonte lëndë narkotike nga Amerika e Jugut drejt Europës, me Italinë si pikë kyçe.Në hetim ishin rreth 40 shtetas italianë dhe shqiptarë.

Sipas reagimit të SPAK, trafiku i drogës realizohej përmes makinave, ndërsa paratë e fituara transportoheshin drejt Shqipërisë duke përdorur linjën e autobusëve Brescia-Elbasan. Organizata vepronte kryesisht në Italinë e Veriut, duke përfshirë qytete si Brescia, Milano, Torino dhe Verona. Autoritetet arritën të identifikojnë liderët e grupit, dy vëllezër shqiptarë, të cilët drejtonin operacionet nga Shqipëria dhe kishin kontakte të drejtpërdrejta me furnizues në Kolumbi dhe Ekuador.

Gjatë hetimeve, që u zhvilluan në bashkëpunim me EUROJUST dhe skuadrat speciale hetimore mes Shqipërisë dhe Italisë, u desh zbërthimi i mesazheve të koduara të përdorura nga trafikantët për të finalizuar këtë operacion. Në nëntor 2021, një nga anëtarët e rrjetit u arrestua me 350 kg kokainë të destinuar për tregun italian.

Arrestimet u shtrinë në disa shtete, ku ndër të ndaluarit në Shqipëri janë Igli Dervishi, Ervin Dema, Edmond Zhuja dhe Genti Berisha, ndërsa në Spanjë u arrestua Gerardo Pashja. Autoritetet vijojnë kërkimet për anëtarë të tjerë të përfshirë në këtë rrjet të fuqishëm kriminal.

Njoftimi i SPAK:

Nën koordinimin e Prokurorisë së Posaçme kundër Korrupsionit dhe Krimit të Organizuar dhe Prokurorisë së Brescias, në orët e para të mëngjesit të 21.01.2025 u finalizua operacioni ICARO, në Shqipëri  dhe Itali, me ekzekutimin e 12 masave të sigurisë “arrest me burg” dhe 8 masave “të marrjes në pyetje të personave nën hetim”.  Personat ndaj të cilëve u ekzekutuan masat e sigurisë ishin pjesë e një organizate kriminale të trafikut të paligjshëm të lëndëve narkotike, kryesisht të llojit kokainë nga Amerika e Jugut.

Oficerët e Drejtorisë së Përgjithshme të Policisë Shqiptare dhe Policisë Italiane, nën koordinimin e Drejtorisë Antimafia të Prokurorisë së Brescias dhe SPAK-ut, kryhen kontrolle të shumta në Shqipëri si edhe në provincat e Brescias, Milanos, Torinos, Veronës, Bolzanos, Cremonës, Novarës, Pavias, Trentos dhe Trevisos ku u bë e mundur dhe ekzekutimi i masave të sigurisë.

Më datën 21.01.2025, në  Shqipëri,  janë arrestuar  me qëllim ekstradimin shtetasit shqiptarë: Sh.P., I.D., E.D., E.Zh., G.B. Ndërsa arrestimi i M.M., nuk është bërë i mundur, pasi është në kërkim.

Hetimet nisën në gjysmën e dytë të vitit 2020, pasi u rregjistrua shpërndarja e lëndës narkotike e llojit kokainë, në disa lokale të zonës Lago di Garda në Itali dhe ato u kryen nën kujdesin e EUROJUST, në kuadër të një skuadre të përbashkët hetimore mes Prokurorisë së Brescias dhe SPAK-ut.

Në hetim ishin rreth 40 shtetas italianë dhe shqiptarë.

Pas identifikimit të furnizuesve të kokainës,  mbi bazën e hetimeve, është rikonstruktuar organigrama e një organizate kriminale italo-shqiptare që merrej me importin e sasive të lëndëve narkotike nga Amerika e Jugut. Në krye të kësaj organizate kriminale janë dy vëllezër shqiptarë nga Elbasani, G.P., dhe Sh.P. Ata i jepnin udhëzime një grupi të besuar në zonën e Brescia dhe provinca të tjera të Italisë së Veriut,  ku kryenin nje veprimtari të shtrirë të importit dhe shitjes të lëndës narkotike, kryesisht të llojit kokainë. Kjo organizatë ka mundësuar të gjitha fazat e trafikut, nga magazinimi, shpërndarja dhe mbledhja e përfitimeve, të cilat më pas i dorëzoheshin drejtuesve të organizatës në Shqipëri, përmes një sistemi të kolauduar, duke  shfrytëzuar shoferët e autobuzëve të linjës Brescia – Elbasan.

Në nëntor të vitit 2021, është kryer arrestimi i një prej personave nën hetim, i cili do t’i dërgonte një sasi prej 350 kg kokainë organizatës, e cila e kryente aktivitetin në zonën e Brescia-s.

Anëtarët e organizatës kriminale kanë përdorur telefona të “kriptuar” nga analiza e të cilëve ka rezultuar edhe përfshirja e tyre në brendësi të kësaj organizate kriminale shqiptare e dedikuar në trafikun ndërkombëtar të qindra kilogramëve të lëndës narkotike, kryesisht kokainë. Hetimet kanë konfirmuar faktin se drejtuesit e kësaj organizate, për të realizuar marrëveshjet me furnizuesit kanë udhëtuar sistematikisht në Kolumbi, Ekuador dhe Emiratet e Bashkuara Arabe, Dubai, ku ndodhen disa prej trafikantëve shqiptarë.

Sondazh

Poll

Lexo gjithashtu

Hapësire reklamuese