Jani Vangjeli, një nga figurat më të spikatura të botanikës shqiptare, ndërroi jetë në moshën 79-vjeçare. Ai ishte një studiues i shquar i florës dhe një kontributor i çmuar në fushën e shkencave natyrore në Shqipëri.
I lindur në Tiranë më 23 qershor 1945, Vangjeli përfundoi studimet e larta në degën e biologjisë pranë Fakultetit të Shkencave të Natyrës, Universiteti i Tiranës, në vitin 1967. Karriera e tij akademike nisi si pedagog në katedrën e Botanikës në të njëjtin universitet (1969-1982). Nga viti 1980 deri në 2007, ai shërbeu si kërkues shkencor në Institutin e Kërkimeve Biologjike, ku për disa vite drejtoi Sektorin e Florës dhe më pas mbajti postin e drejtorit të Institutit dhe kryetarit të Këshillit Shkencor (1993-1998).
Gjatë drejtimit të tij, Instituti hapi horizonte të reja në studimet ekologjike, përfshirë formacionet bimore dhe dinamikën e vegjetacionit. Për kontributin e tij të jashtëzakonshëm, Vangjeli mori titullin "Profesor" në vitin 1994 dhe në vitin 2008 u bë anëtar i Akademisë së Shkencave të Shqipërisë.
Studimet e tij u fokusuan në florën dhe vegjetacionin shqiptar, veçanërisht në bimët e rralla dhe të kërcënuara, si dhe në biodiversitetin dhe vegjetacionin natyror potencial. Për punën e tij shkencore, ai u nderua me çmimin prestigjioz “Petrit Radovicka” nga Akademia e Shkencave.
Me humbjen e akademik Jani Vangjelit, Akademia e Shkencave e Shqipërisë e cilësoi ndarjen e tij si humbje të një prej anëtarëve më të vlefshëm të saj, duke e përkujtuar atë si një figurë të shquar dhe të përkushtuar në shërbim të shkencës shqiptare.
Sondazh
Lexo gjithashtu
