Europol ditë më parë arriti të godasë një tjetër rrjet komunikimi i cili përdorej nga kriminelët në të gjithë botës, i quajtur “GHOST”. Ky aplikacion ishte kthyer një ndër rrjetet më të preferuara për kriminelët në të gjithë botës.
Lidhur me këtë ngjarje të fundit ka reaguar edhe gazetari investigativ, Artan Hoxha, i cili ka zbuluar se mes këtyre grupeve kriminale të “zbërthyera” në Europol ka dhe shumë shqiptarë.
Sipas asaj që Hoxha bëri me dije mes të arrestuarve në Australi, pas çmontimit të këtij aplikacioni ka dhe shqiptarë.
“Kjo pajisje ka qenë telefon i veçantë që vetë krijuesi e shiste për 3 mijë dollarë dhe kishte gjashtë muaj falas, pastaj kishte abonim. Pajisja nuk kishte nevojë as për numër telefoni as për mjet identifikimi dhe as për adresë. Megjithatë pajisja ka server. Një nga serverat ishte në Islandë. Pajisja filloi të shtrihej, por hetimet që po bëheshin sidomos për narkotrafikantët në Evropë, bënë që sidomos Europol të vihej në alarm.
Para tre ditësh kanë bërë operacion, ku kanë goditur kryesisht në Australi, Amerikë, Kanada dhe BE. Deri tani ka të dhëna se ka shqiptarë. Nuk janë në nivelin e SKY ECC. Në rastin konkret, edhe në Australi edhe në Europë, patjetër që ka shqiptarë.
Goditja e këtij aplikacioni dhe marrja e serverave, edhe pse aplikacioni ka qenë i ndërtuar që në momentin që kapet, çohet komandë dhe fshiheshin të dhënat. Teknologjia, çdo gjë që shkruhet diku regjistrohet.
Shqiptarët janë gjetur, por nuk ka veprime ende në territorin tonë. Në Australi janë arrestuar shqiptarë. Në Itali janë gjetur shqiptarë që punojnë për Ndraghetën”, tha Hoxha.
Një operacion i madh ndërkombëtar, i koordinuar nga Europol, ka çuar në zbërthimin e aplikacionit të kriptuar “Ghost,”
Operacioni, që përfshiu disa vende të botës, rezultoi në dhjetëra arrestime për aktivitete të paligjshme si trafik droge dhe planifikim vrasjesh.
Sipas mediave australiane, aplikacioni “Ghost” ishte përdorur në Australi edhe nga një organizatë kriminale shqiptare të cilët kishin komunikuar me mafian italiane. Një nga të arrestuarit në Viktoria, i cili dyshohet për trafikimin e kanabisit me vlerë 1.2 milionë dollarë, rezulton te këtë lidhje me krimin e organizuar shqiptar.
Çfarë është Ghost?
Popullariteti i aplikacioneve të mesazheve të koduara është në rritje, ku WhatsApp është një nga më të njohurit. Këto aplikacione përdorin enkriptim për të siguruar mesazhe dhe janë të ligjshme për t’u përdorur.
Ghost, i cili u bë i njohur në vitin 2021, pas “zbërthimit” të SKY ECC, tërhoqi kriminelët për shkak të veçorive të tij unike. Në vend të një shkarkimi të thjeshtë aplikacioni, përdoruesit duhej të blinin një telefon të modifikuar posaçërisht për këtë aplikacion. Europol e përshkroi Ghost si një sistem gjithëpërfshirës, i kompletuar me një rrjet rishitësish në shumë vende.
Aplikacioni i lejoi përdoruesit të qëndronin plotësisht anonim duke mos kërkuar asnjë informacion personal ose numra telefoni. Gjithashtu, sipas asaj që mediat e huaja bëjnë me dije referuar dhe informacioneve të dhëna nga zyrtarët, mësohet se aplikacioni kishte tre protokolle të veçanta të enkriptimit dhe ofroi veçori për përdoruesit për të fshirë në distancë mesazhet dhe rivendosjen e telefonave, duke shtuar një tjetër kod sigurie nëse pajisjet sekuestroheshin.
Sipas Europol, Ghost operonte me serverë të fshehur në Islandë dhe Francë. Ndërsa, mësohet se themeluesin e tij e kishte me bazë në Australi dhe transaksionet financiare u gjurmuan në Shtetet e Bashkuara.
Kush e përdor aplikacionin Ghost?
Ghost përdorej kryesisht nga kriminelët, konfirmoi Europol. Aplikacioni kishte me mijëra përdorues, me afërsisht 1000 mesazhe të shkëmbyera çdo ditë. Zëvendës Drejtori Ekzekutiv i Europolit, Jean-Philippe Lecouffe, vuri në dukje se operacioni kishte çmontuar një mjet kritik për krimin e rëndë dhe të organizuar, duke përfshirë trafikun e drogës, tregtinë e armëve dhe pastrimin e parave në shkallë të gjerë.
Deri më tani mësohet se 51 persona kanë rënë në pranga, përdorues të këtij aplikacioni, shumica e të cilëve ndodheshin në Australi.
A ka ndodhur kjo më parë?
Operacione të ngjashme kanë çmontuar më parë aplikacione të tjera kryesore si EncroChat dhe Sky ECC, të cilat gjithashtu përdoreshin kryesisht nga kriminelët. Tre vjet më parë, FBI drejtoi dhe mbylli më pas ANOM, një tjetër shërbim i koduar, duke çuar në arrestime të shumta.
Europol pranoi se ndërsa Ghost ishte më i vogël në krahasim me paraardhësit e tij, natyra e fragmentuar e tregut të aplikacioneve të koduara ende paraqet sfida të rëndësishme. Lecouffe theksoi se rrjetet më të vogla ndonjëherë mund të strehojnë operacionet kriminale më të rëndësishme.
Sondazh
Lexo gjithashtu
