Kushëriri i Fredi Belerit, Jani Beleri dhe nënkryetari i Omonias për Himarën, Nestoras Varfis raportohet se janë mbajtur disa orë në kufirin mes Shqipërisë dhe Greqisë. Newsbomb.al mëson se bëhet fjalë për ndalimin e këtyre dy shtetasve në Pikën Kufitare të Mavromatit, në zonën e Finiqit.
Këta shtetas kanë pasur me vete fletëpalosje për kandidimin e Fredi Belerit në zgjedhjet për eurodeputet dhe "fletushka" të tjera që janë cilësuar si me përmbajtje të dyshuar terroriste.
Menjëherë, nga ana e efektivëve të Policisë Kufitare është bërë ndalimi i shtetasve Jani Beleri dhe Nestoras Varfis. Në Doganën e Mavromatit është kërkuar dhe ndihma e Drejtorisë së Antiterrorit, në Drejtorinë e Policisë së Shtetit.
Lajmin e ka bërë të ditur deputeti grek dhe profesori i së Drejtës Ndërkombëtare, Angelos Syrigos. Ai ka thënë për mediat në vendin fqinj se dy shqiptarët që janë pjesë e deklaruar e minoritetit grek janë ndaluar mbrëmjen e djeshme rreth orës 23:00 dhe janë lënë të lirë vetëm mëngjesin e sotëm.
Efektivët në Stacionin Kufitar të Mavromatit në Thesproti kanë kërkuar ndihmën e Antiterrorit, për të shqyrtuar nëse materialet kishin përmbajtje ekstremiste/terroriste, por sipas deputetit Angelos Syrigos kjo drejtori në Policinë Shqiptare funksionon deri në orën 22.00.
"Çështja është edhe më e ndërlikuar pasi antiterrorizmi nuk funksionon pas orës 22:00 të natës në Shqipëri, dhe për pasojë ndalimi i dy grekëve është bërë që nga mbrëmja në postën kufitare shqiptare", ka thënë deputeti grek, përcjell newsbomb.al.
Në makinën ku udhëtonin kushëriri i Fredi Belerit dhe nënkryetari i Omonias për Himarën, janë gjetur broshura parazgjedhore të Fredi Belerit dhe fletë votimit të Demokracisë së Re, parti e cila e ka vendosur atë në garë për eurodeputet. Jani Beleri dhe Nestoras Varfis po ktheheshin në Himarë, nga një tubim që kishin pasur në Athinë mëngjesin e së dielës.
Pasi materialet janë parë mëngjesin e kësaj të hëne, datë 3 Qershor, është konstatuar se ato nuk përmbanin asnjë element të dyshimtë dhe dy shqiptarët pjesë e minoritetit grek janë lënë të lirë.
Në dijeni të këtij ndalimi ka qenë Ambasada e Greqisë në Shqipëri dhe Konsulli grek në Gjirokastër, i cili ka mbërritur në Stacionin Policor të Mavromatit. Ai ka qëndruar me kushëririn e Fredi Belerit dhe nënkryetarin e Omonias deri në mëngjes, kur ata janë lënë të lirë.
© Newsbomb.al
Sondazh
Lexo gjithashtu
