Ish-kryebashkiaku, Fredi Beleri i ka “shpallur luftë” presidentit të vendit, Bajram Begajt, pasi ky i fundit dekretoi datën 4 gusht 2024, për zhvillimin e zgjedhjeve të parakohshme për Bashkinë e Himarës.
Beleri i ka kërkuar Gjykatës Administrative të Tiranës që të pezullojë dekretin e Presidentit Begaj, për shpalljen e zgjedhjeve në këtë Bashki.
Në kërkesën e tij ish-kryebashkiaku argumenton se do të ankimojë vendimin dhe deri atëhere kërkon pezullimin e zbatimit të aktit administrativ.
“Ky Akt administrativ individual, do të kundërshtohet nga kërkuesi me Padi drejtuar Gjykatës kompetente, pasi vjen në kundërshtim me Kushtetutën, Kodin Zgjedhor, si dhe Kodin e Procedurave Administrative.
Para ngritjes së padisë, kërkuesi i drejtohet Gjykatës me kërkesë për sigurimin e padisë, pezullimin e zbatimit të aktit administrative, Dekret i Presidentit të Republikës nr.244, datë 05.07.2024 të Presidentit të Republikës deri në marrjen e vendimit përfundimtar"
Kërkuesi Dhionisios Alfred Beleri aktualisht është Kryetar i Zgjedhur i Bashkisë Himarë, cilësi që sipas ligjit do ta mbajë deri në kalimin e afatit 30 ditor të paraqitjes së ankimit kunder vendimit nr. 69 datë 05.07.2024 të Komisionerit Shtetëror të Zgjedhjeve, ose deri në shpalljen e vendimit që do të shqyrtojë ankimin e tij, kundër vendimit nr. 69 datë 05.07.2024 të Komisionerit Shtetëror të Zgjedhjeve, në përputhje me nenin 164/2 të ligjit nr. nr. 44/2015 Kodi I Procedurave Administrative.
Kjo pasi shtetasi Dhionisios Alfred Beleri mban Mandatin e vlefshëm të Kryetarit të Zgjedhur të Bashkisë Himarë, mandat i fituar në zgjedhjet e datës 14 maj 2023, dhe që aktualisht është i vlefshëm, sa kohë që vendimi i Komisionerit Shtetëror të Zgjedhjeve, nr. 69 datë 05.07.2024 me të cilin në të njëjtë kohë, ky organ administrativ shpalli të pavlefshëm Mandatin por shpalli dhe ndërprerjen e parakohshme të tij, është shpallur në datën 05.07.2024, dhe ndaj tij lejohet 5 ankim, dhe si I tillë ky akt është i paekzekutueshëm në kuptim të neneve 133/1 dhe 164/2 të ligjit nr. 44/2015 Kodi I Procedurave Administrative”, thuhet në shkresë.
Kujtojmë se ditën e enjte Komisioni Qendror i Zgjedhjeve i ndërpreu mandatin e kryebashkiakut, Fredi Belerit, i cili u dënua me vendim të formës së prerë me dy vite burg.
Menjëherë pas këtij vendimi dhe shkresës nga Kryeministria për datën e re të zgjedhjeve, Presidenti Bajram Begaj thirri në takim komisionerin Ilirjan Celibashi, për ta pyetur nëse KQZ ka kapacitetet dhe gadishmërinë për zhvillimin e zgjedhjeve në këtë bashki.
Pas kësaj konsulte, Presidenti Bajram Begaj dekretoi datën 4 gusht 2024 për zhvillimin e zgjedhjeve për kryetar bashkie në bashkinë Himarë.
Ndërkohë, kujtojmë se këtë të hënë Vangjel Tavo u votua në mbledhjen e Kryesisë së PS si kandidat për kreun e Bashkisë së Himarës.
Sondazh
Lexo gjithashtu
