Hapësire reklamuese

Aktualitet

Bujar Leskaj me fjalë zemre për Ali Osekun: Artisti i madh dhe guximtar

Shkruar nga Newsbomb
Bujar Leskaj me fjalë zemre për Ali Osekun: Artisti i madh dhe
Ali Oseku

Ndarja nga jeta e piktorit Ali Oseku ka sjellë edhe reagimet e para në opinionin publik. Deputeti Bujar Leskaj i ka dedikuar disa rreshta të ndjerit, përmes një postimi në rrjetet sociale. Ai e përshkruan Osekun si një artist të madh dhe guximtar.

Gjithashtu thekson faktin se si piktori nuk u përshtat dhe nuk pranoi asnjëherë vendimet e sistemit komunist socialist. Si ish i burgosur politik, pedagogu la gjurmë të shënjuara në historinë e artit shqiptar dhe për këtë Leskaj shkruante:

" Me keqardhje mësova që miku im, piktori i shquar modernist e antikonformist, ish- i burgosuri politik nga diktatura komuniste, pedagogu Ali Oseku ndërroi jetë në moshën 80- vjeçare.

Ali Oseku ishte artisti, i cili asnjëherë nuk u përshtat me metodat krijuese të Realizmit Socialist. Në pikturat e tij nuk ka figura. Në të njëjtën kohë që njëri shikon një mal, një tjetër shikon format e kraterit të një vullkani. Ishte një piktor guximtar e modernist i lindur.

Ali Oseku në vitet ‘70 bënte pjesë në piktorët e rinj, të cilët eksperimentonin një art “ndryshe” nga ai i realizmit socialist.

Ishte “verbuese” për frymën e realizmit socialist “drita” e pikturave e  skenografive të tij, çka solli në vitet ’70 jo vetëm burgosjen e më pas privimin nga jeta artistike, por edhe që detyruan autorin që të digjte veprat e tij...

Nga ajo kohë mbetën vetëm  “Portreti i nënës” e “Portret burri”…

Bashkëkohës i disa prej emrave më të shquar të artit shqiptar, Ali Oseku në vitet 1959 – 1963 ndoqi liceun artistik “Jordan Misja”. Në vitin 1969, u diplomua për pikturë në “Akademinë e Arteve të Bukura”, Tiranë. Nga viti 1970 deri në vitin 1973 bëhet skenograf i “Teatrit Kombëtar të Operas dhe Baletit”.

Ishte një nga artistët e dënuar me burg në vitin 1975 në burgun famëkeq të Spaçit, pasi ishte dërguar për riedukim më 1973. U dënua sepse vepra e tij u cilësua moderne. Pas daljes nga burgu (1979), punoi si punëtor krahu pa të drejtë të ekspozimit deri në vitin ’91, kur iu kthye krijimtarisë duke qenë kurator në Galerinë Kombëtare të Arteve dhe më pas pedagog e shef katedre në Akademinë e Arteve të Bukura.

Nga viti 1998 deri në vitin 2014, u bë Profesor i Asociuar dhe Përgjegjës i Departamentit të Grafikës në “Akademia e Arteve të Bukura”, Tiranë. Në vitin 2014 e në vazhdim, piktor në krijimtarinë e lirë. Me ndryshimet e sistemit politik në Shqipëri pas viteve ’90, mjeshtri Ali Oseku u bë një ndër emrat më të lakuar në artin pamor shqiptar.

Ka realizuar një numër të madh pikturash dhe ka marrë pjesë në disa ekspozita brenda dhe jashtë vendit, pas shembjes së regjimit komunist.

Ekspozita e tij e fundit u hap në 2023 me titull:  “All light ëe cannot see” - E gjithë drita që nuk mund të shohim.

 

Ai ishte gjithmonë krenar për origjinën e tij gjakovare.

Ali Oseku nuk vdes kurrë. Thjesht ai do të pushojë pak në paqe për të ngjyrosur qiellin me dritën, elegancën, shpirtin e lire dhe bujarinë e tij!

I paharruar, Mjeshtër i Madh , fisniku

Ali Oseku !"

 

Sondazh

Poll

Lexo gjithashtu

Hapësire reklamuese