Deputetja Grida Duma shprehet se Partia Demokratike duhet të pranojë përgjegjësitë dhe të mos ndikohet nga deliri se është gati për të ardhur në pushtet.
Në një intervistë në rubrikën “Opinion” të News24, Duma tha se shoqëria shqiptare ka përfunduar në atë pikë ku vlerëson të fortin dhe dredharakun si të suksesshëm.
Sipas Dumës, kryeministri Edi Rama është autokrat që beson se mund t’i bëjë të gjitha vetë.
Pjesë nga intervista:
PD-ja, duke u nisur nga vetja, nuk duhet të ekzistojë për veten, por për të tjerët. Ky është problemi i organizatave politike sot, ruajnë personat që janë pranë njëshit dhe diskretitojnë të tjerët, të rinjtë.
Vendi i dytë më i pasur me ujëra në Europë të jetë sot në këtë gjendje. Të paktën vetëm një resurs krahasimor të kishim marrë, ne duhet të kishim superuar sot vendet e Ballkanit.
Unë do të vlerësoja shumë, në të marrit përgjegjësi të mos ketë gjithmonë delirin që është gati. As nuk duhet pasur deliri që ne po të vijmë sot në pushtet jemi gati, Rama ka idenë që mund t’i bëjë të gjitha vetë, ai ka tjetër problem. Nuk ka ministra në qeverinë Rama. Ky është deliri i liderit autokrat. Nuk i bën përshtypje askujt që tha do hap 300 mijë vende pune dhe nuk i hap, “hë mo se e tha në fushatë”.
Në folkun e kulturës sot kemi përfunduar të vlerësojmë të fortin dhe më dredharakun si të suksesshëm.