Detaje të reja janë zbardhur në lidhje me ngjarjen e ndodhur pak ditë më parë në Durrës, ku një biznesi iu vendos një sasi e madhe tritoli.
Tre persona ende të paidentifikuar, të veshur si ushtarakë, vendosën 50 kg tritol të ndarë në 25 kallëpe dhe të lidhur me kapsolla e fitila në dy polet plus-minus të një baterie makine në një fabrikë çimento në Durrës, por fatmirësisht lënda plasëse nuk shpërtheu për shkak të voltazhit të ulët të baterisë së makinës.
Burime për media bëjnë me dije se Prokuroria dhe Policia e Durrësit kanë arritur të gjejnë vendin se ku është blerë sasia e tritolit.
Mësohet se tregtari është shprehur se tritoli u shitet vetëm kompanive që kanë licencë për përdorimin e sasive të tritolit dhe asnjë individi tjetër.
Shitësi i ka treguar policisë emrat e të gjithë personave që kanë blerë tritol gjatë kohëve të fundit. Sakaq, policia po punon për zbardhjen e plotë të rrethanave të ngjarjes, teksa dyshohet se tritoli është vënë për shkak të konkurencës.