Një ngjarje e rëndë ka ndodhur në qendrën për refugjatë në qytetin e Korinthit, në Greqi, ku një 24-vjeçar kurd i ka dhënë fund jetës.
Mediat greke bëjnë me dije se ai ishte në qendrën e paraburgimit për 16 muaj dhe priste që dje të lihej i lirë, por autoritetet greke morën vendimin që ai të mbahej edhe disa kohë në paraburgim.
24-vjeçari i dëshpëruar për vendimin ka ndërmarrë aktin e rëndë. Sipas mediave greke, refugjati është gjetur i vdekur në një nga banjat e qendrës.
Tensionet shpërthyen në Qendër pas incidentit. Disa emigrantë-refugjatë sulmuan ambulancën që shkoi në vend për të marrë trupin e 24 vjeçarit.
Pas ngjarjes së rëndë ka reaguar edhe Lëvizja Kundër Racizmit dhe Fashizmit (KEERFA), e cila denoncon kushtet çnjerëzore në kampet e qëndrimit të refugjatëve, ku sipas mediave greke mbahen njerëz që nuk kanë kryer asnjë krim, por thjesht kërkojnë azil politik.