Një 25-vjeçar shqiptar që u përfshi në trafikun e drogës për të shlyer një borxh që u kishte trafikantëve të cilët e çuan në Britaninë e Madhe, është dënuar me 28 muaj burg.
Bëhet fjalë për të riun Erion Hoxha, i cili u arrestua muajin e kaluar teka po ngiset një mjet tip Audi, të pasiguruar. Në momentin e ndalimit nga Policia, ai u tha oficerëve se kishin ndaluar njeriun e gabuar dhe në momentin e ndalimit kishte sulmuar një polic, duke i shkaktuar një prerje në dorë dhe mavijosje.
Gjatë kontrollit në mjetin e tij u gjetën 19 pako me kokainë, një patentë greke, një telefon celular dhe 285 paund.Ndërsa gjatë kontrollit në shtëpi, policia i gjeti edhe 19 pako të tjera me kokainë, të fshehura në dhomën e gjumit. Në telefonin e Hoxhës u zbuluan mesazhe që tregonin përfshirjen e tij në furnizimin me kokainë nëpërmjet dërgimit me kod postar.