Kryeministri Edi Rama ka replikuar ndaj një draft-dokumenti të publikuar nga BIRN, ku thuhet se qeveria ka vendosur 113 milionë euro për të ricikluar mbetjet e Fierit dhe Elbasanit në Dokumentin e Politikave Prioritare. Ai thotë se qeveria nuk ka vendosur asgjë të tillë, duke sqaruar se shumat e përcaktuar në këtë lloj dokumenti orientues janë shuma që përveç buxhetit të shtetit, lidhen edhe me financime të mundshme alternative, duke theksuar se “guri 100 e kusur milionësh s’ka asnjë lidhje me këtë dokument, as me ndonjë vendim tonin”. Reagimi i Edi Ramës Asaj shprehjes popullore, “hedh një budalla një gur në lumë dhe 100 të mençur s’e nxjerrin dot”, po i bashkangjis si adresë Fletoren Zyrtare, ku çdo shejtanbudalla nga ata që e kanë nxjerrë nga nuk e di ku, se qeveria paskej vendosur 100 e kusur milionë për të ricikluar mbetjet e Fierit dhe Elbasanit në Dokumentin e Politikave Prioritare, mund të gjejnë se çfarë ka vendosur në fakt në atë dokument qeveria në mbledhjen e miratimit të tij, e pastaj mund t’ia tregojnë publikut, ndërkohë që për sa na takon nuk kemi vendosur asgjë të tillë! Me këtë rast sqaroj se shumat e përcaktuara në këtë lloj dokumenti orientues janë shuma që nuk lidhen vetëm me buxhetin, po edhe me financime të mundshme alternative, ndërkohë që guri 100 e kusur milionësh s’ka asnjë lidhje as me këtë dokument, as me ndonjë vendim tjetër tonin! Në mbyllje, mediave “investigative” që marrin pjesë në hedhje gurësh në mexhelis, u lutem të mos harrojnë t’u drejtohen edhe burimeve zyrtare, qoftë edhe për të larë gojën, sepse mund t’i kursejnë vetes figurën e keqe të të keqinformuarit që keqinformon, ndërkohë që misioni i tyre është ta informojnë publikun duke e mbrojtur nga keqinformimi. Marrë nga © twitter.com/ediramaal

Asaj shprehjes popullore, “hedh një budalla një gur në lumë dhe 100 të mençur s’e nxjerrin dot”, po i bashkangjis si adresë Fletoren Zyrtare, ku çdo shejtanbudalla nga ata që e kanë nxjerrë nga nuk e di ku, se qeveria paskej vendosur 100 e kusur milionë për të ricikluar mbetjet e… pic.twitter.com/3jUxJoJACY

— Edi Rama (@ediramaal) August 25, 2023

Ndërkohë sipas BIRN, qeveria shqiptare po planifikon të shpenzojë 113 milionë euro për dy vitet e ardhshme, për menaxhimin e mbetjeve në Fier dhe Elbasan, pavarësisht se koncesionet e mëparshme prej 50 milionë eurosh për ndërtim inceneratorësh janë në gjykim për korrupsion dhe pastrim parash.