Mbretëria e Bashkuar do të presë këtë të hënë ministrat evropianë për bisedime të rëndësishme për "zmbrapsjen e agresionit rus", vetëm dy ditë pasi aleatët e Ukrainës kërkuan nga Moska të angazhohej për një armëpushim.
Përfaqësues nga Franca, Gjermania, Italia, Polonia, Spanja dhe Bashkimi Evropian do t’i bashkohen Sekretarit të Jashtëm britanik, David Lammy, në Londër për një takim të grupit të njohur si “Weimar+”.
Ky koalicion u krijua në shkurt si përgjigje ndaj ndryshimeve në politikën amerikane ndaj luftës në Ukrainë dhe Rusi, pas qëndrimeve të reja të administratës së Presidentit Donald Trump.
Takimi vjen pas vizitës së së shtunës nga udhëheqësit e Francës, Gjermanisë, Polonisë dhe Mbretërisë së Bashkuar në Kiev, ku ata i bënë thirrje Rusisë të bjerë dakord për një armëpushim 30-ditor pa kushte për të lejuar bisedimet e paqes - një propozim që ata thanë se u mbështet nga SHBA-të.
Ndërkohë, Presidenti rus Vladimir Putin propozoi të dielën mbajtjen e negociatave të drejtpërdrejta me Ukrainën në Stamboll më 15 maj, por nuk iu përgjigj kërkesës evropiane për një armëpushim të 30-ditor.
Presidenti ukrainas Volodymyr Zelensky deklaroi se është i gatshëm të takohet me Putinin në Turqi, por nuk e bëri të qartë nëse do të marrë pjesë nëse Rusia nuk pranon propozimin për armëpushim.
Sondazh
Lexo gjithashtu
